Vakfiyenin Transkripsiyonu;Bin Ğuruş ve Daha Ziyade Meblağ ve Kıymeti Havi Hüccet Tahririne Mahsus Varaka
Kıymeti on ğuruştur.
Kadının onayı : Cemaziye’l – Ahir 1326 (1910)
Elhamdülillahi ala külli hal, el münezzeh anit-teğayyür ve’l intikal. Ve’s salatü ve’s - selam ala Muhammed’ini’l mevsuf bi makarimi’l ahlak ve muhasini’l hisal ve ala alihi
Ve eshabihi’l aricine ila mearici’l – Kemal. Emma ba’d : iş bu vakfiyyetü’t – tahavi ve vesika-i şer’iyyetü’l metavinin tahrir ve inşa ve tasdir ve imlasına
Badi oldur ki : Medine-i Trabzon nevahisinden Şarlı nahiyesine tabi Bayır Mahalle karye Ahalisinden sahibu’l hayrat ve’l –Hasenat Kalaycı oğlu Muhammed Efendi
İbni Hacı Kamil Efendi Bin İsmail Efendi, nahiye-i mezkür hükümet konağında, mahkeme-i şer’iyyeye mahsus odada mek’ud meclis-i şer’i şerif-i enverde zikri ati vakfa
Li ecli’t Tescil mütevelli nasb ve ta’yin eylediği karye-i mezkürden Kalaycı oğlu Hasan Efendi bin Hacı Kâmil Efendi mahdarında ikrar-ı sahih-i şer’ii ve itiraf-ı sarih-i meri
Eyleyup salifu’z zikr Şarlı nahiyesinin Nefs kasabasında medrese ittisalinde kain, şarken : Çarşu meydanı ve ba’zan Tarik, ve Ğarben : medrese hisarı, ve şimalen kabristana
giden tarik, ve cenuben : Tarik-i âm ile mahdud bina ve inşa eylediğim birbirine muttasıl sekiz bap dükkanı hisbeten lillahi’s Samed vakf-ı sahih-i şer’ii ve habs-ı sarih-i mer’ii ile
Vakf ve habs idüp şöyle şart ve ta’yin eyledim ki : Dakakin-i mezkürler senevi bi’l -yed-i mütevelli icare-i şeriyye ile ahare icar olunup hasıl olan ğallesinden tekalif-i
Sultani ba’de’l-eda baki her ne fazla kalur ise dekakin-i mezkürlerin ta’mir termimleri ba’del-ecr ebkiye kalan medrese-i mezkurun ta’mir ve termimine harc ve sarf oluna ve medrese-i
Mezkür ta’mire muhtaç olmadığı surette ğalle-i mezkür medrese-i mezkürde müderris olan efendiye virile. Ve vakf-ı mezkürün tevelliyeti hayatda oldukça bana ait olup
Vefatımdan sonra evlad-ı zükurun ekberi batnan ba’de batn ve neslen ba’de nesl mütevelli ola deyu ta’yin-i şurut ve tebyin-i kuyut berle dekakin-i mahdut-i mezkürleri fariğan
Ani-ş-şevağil mütevelli-i mezbure teslim, ol dahi vakfiyyet üzere kabz ve teslim, ve sair mütevellilerin evkafda tasarrufları gibi tasarruf eyledi didikde, ğıbbe’t-Tasdikiş-
Şer’i vâkıf mûmâ ileyh canib-i şikaka azım ve mütevelli-i mezburler ile husumet ve nizaa cazim olup vakıf âkar imam Azam hazretleri indinde sahih,
Lakin menzile-i ariyetde olup şeref-i luzumi müstelzim olmamağle vakf-ı mezkürden rücu’ caiz olmağla dekakin-i mezkürleri kel evvel mülküme istirdat eyledim
dedikte mütevelli-i mezbur dahi cevaba tesaddi ile eğer çi inde’l-imam Azam hal-i besta ve tafsil olunan minval üzere olduğu cay-i işkal değildir lakin
Arif-i hemedani Ebu Yusuf eş-şehir bil imam essani indehu : vakıf mücerret vekaftü dimekle ve imam Muhammed bin Hasan eş-şeybâni indehu
ve te’yid-i zikriyle vakıf lazım olur deyü red ve teslimden imtina ve bu cihetle husumet ve niza idüp huzur-i şer’iyyemizde müterafian
Ve her biri mübteğasınce fasl ve hasme taliban olduklarında taraf-ı şer’i şerifden dahi vakf canibi evveli ve ahiri görülüp alimen
bi’l-hilafi’l-cari vakf-ı mezkurun sihhat ve luzumuna hukm-i sahih-i şer’i ve kada-i sarih-i mer’i olunup min ba’d vakf-ı mezkur sahih ve lazım oldu.
Fe men beddelehü ba’de ma semiahü fe innema ismuhu alellezine yübeddilünehü. İnnellahe semiun alim. Haberi zalike, ve Hurrire fi’l-yevmi’s-samin min şehri cumaziyel ahirde
lisene sitte ve işrin ve selase mie ve elf.
Seyyid zâde Hacı Hasan Efendi bin Ali Ağa
Bin Ali zâde Hacı Mustafa Ağa bin Muhammed Efendi
Çolak zâde Hacı Ömer Ağa bin Ali Ağa
Bahadır zâde Hacı Muhammed Efendi bin Abdullah Efendi
Hacı Bekir Efendi zâde Hacı Osman Efendi bin Bekir Efendi
